ಕನ್ನಡದಲ್ಲಿ ಇಂಜಿನಿಯರಿಂಗ್ : ಸಾದ್ಯವೇ ? ಸಾಧುವೇ ? ಪ್ರಸ್ತುತವೇ ?
ಅಖಿಲ ಭಾರತೀಯ ತಾಂತ್ರಿಕ ಶಿಕ್ಷಣ ಪರಿಷತ್ತು 2021-22 ಶೈಕ್ಷಣಿಕ ವರ್ಷದ ಸಾಲಿನಿಂದ ಕನ್ನಡ ಸೇರಿದಂತೆ ಭಾರತದ ಏಳು ಭಾಷೆಗಳಲ್ಲಿ ಇಂಜಿನಿಯರಿಂಗ್ ಶಿಕ್ಷಣವನ್ನು ತರಲು ಕರೆ ನೀಡಿದೆ. ಇದರ ಹಿನ್ನೆಲೆಯಲ್ಲಿ ವಿಶ್ವೇಶ್ವರಯ್ಯ ತಾಂತ್ರಿಕ ವಿಶ್ವವಿದ್ಯಾಲಯ ತಯಾರಿ ನಡೆಸಿರುವ ವರದಿಗಳಿವೆ. ಕನ್ನಡದಲ್ಲಿ ತಾಂತ್ರಿಕ ಶಿಕ್ಷಣ ಸಾಧ್ಯವೇ ಎಂದರೆ ಖಂಡಿತವಾಗಿ ಸಾಧ್ಯ ಎಂದು ಸಾಧುವೇ , ಪ್ರಸ್ತುತವೇ ಎಂದರೆ ಇಲ್ಲವೆಂದೇ ಹೇಳಬೇಕಾಗುತ್ತದೆ ಅಭಿಮಾನವನ್ನು ಹೊರಗಿಟ್ಟು ನೋಡಿದರೆ ದೇಶ ಭಾಷೆಗಳಲ್ಲಿ ಇಂಜಿನಿಯರಿಂಗ್ ಶಿಕ್ಷಣ ಪಡೆದವರು ಮುಂದಿನ ದಿನಗಳಲ್ಲಿ 'ತಾಂತ್ರಿಕ ಅಸ್ಪೃಶ್ಯ' ರ ಗುಂಪಾಗಿ ಬದಲಾಗುವ ಅಪಾಯಗಳು ಇಲ್ಲದಿಲ್ಲ. ಈ ಕುರಿತಾಗಿ ವಿವಿಧ ಆಯಾಯಗಳ ಚರ್ಚೆಗಳು ಮುಂದಿವೆ.
ವಾಸ್ತವತೆ ಮತ್ತು ರಮ್ಯತೆ
ಎದುರಿಗಿರುವ ನಿಜವಾದ ಸಮಸ್ಯೆಗಳನ್ನು ಪರಿಹರಿಸಲು ಆಗದಿದ್ದರೆ ಅದರಿಂದ ತಪ್ಪಿಸಿಕೊಳ್ಳುವ ಸುಲಭವಾದ ದಾರಿಯೆಂದರೆ ತಲುಪಲಾಗದ , ಗಳಿಸಲಾಗದ ,ರಂಜನೀಯ ರೋಚಕ ಗುರಿಗಳನ್ನು ಜನರ ಮುಂದಿರಿಸುವುದು. ಜಗತ್ತಿನ ಎಲ್ಲ ಶಿಕ್ಷಣತಜ್ಞರು ಮಗುವಿನ ಪ್ರಾಥಮಿಕ ಹಂತದ ಐದು ವರ್ಷಗಳ ಶಿಕ್ಷಣ (5ನೇ ತರಗತಿ) ತಾಯಿನುಡಿ ಅಥವಾ ಪರಿಸರದ ನುಡಿಯಲ್ಲಿ ಇರಬೇಕೆಂದು ಹೇಳುತ್ತಿರುವಾಗ ಅವೆಲ್ಲವನ್ನು ಗಾಳಿಗೆ ತೂರಿ ಶಿಕ್ಷಣ ಮಾಧ್ಯಮ ಪಾಲಕರ ಆಯ್ಕೆಯ ಹಕ್ಕು ಎಂದು ಒಪ್ಪಿ , ಮಗು ಮೊದಲ ಐದು ವರ್ಷಗಳಲ್ಲಿ ನಾಲ್ಕಾರು ಭಾಷೆಗಳನ್ನು ಕಲಿಯುವ ಸಾಮರ್ಥ್ಯ ಹೊಂದಿರುತ್ತದೆ ಎಂದು ವಾದಿಸುತ್ತ ಕನ್ನಡದ ಶಾಲೆಗಳನ್ನು ಇಂಗ್ಲಿಷ್ ಮಾಧ್ಯಮದ ಶಾಲೆಗಳಲ್ಲಿ ಬದಲಾಯಿಸುತ್ತ ಅಲ್ಲಿ ಕನ್ನಡವನ್ನು ಉಳಿಸಿಕೊಳ್ಳದೆ ಇಂಜಿನಿಯರಿಂಗ್ ಶಿಕ್ಷಣವನ್ನು ಕನ್ನಡದಲ್ಲಿ ಕೊಡುತ್ತೇನೆ ಎಂದು ಹೊರಡುತ್ತಿರುವುದು ನೆಲುವಿಗೆ ಹಾರದ ಬೆಕ್ಕು ಮುಗಿಲತ್ತ ನೋಡಿದಂತಾಗಿದೆ. ಕನ್ನಡ ಅಥವಾ ಯಾವುದೇ ದೇಶಭಾಷೆಯಲ್ಲಿ ಇಂಜಿನಿಯರಿಂಗ್ ಶಿಕ್ಷಣ ತರಲು ಯತ್ನಿಸುವ ಮೊದಲು ಕಳೆದ ವರ್ಷ ಎಷ್ಟು ಪಿಯುಸಿ ವಿಜ್ಞಾನದ ವಿದ್ಯಾರ್ಥಿಗಳು ಕನ್ನಡದಲ್ಲಿ ಬರೆದಿದ್ದರು, ಎಷ್ಟು ಮಂದಿ ಸಿಇಟಿಯನ್ನು ಕನ್ನಡದಲ್ಲಿ ಬರೆದಿದ್ದರು ಎಂದು ಪ್ರಶ್ನಿಸಿಕೊಳ್ಳಬೇಕು. ಹೊಟ್ಟೆ ಬಟ್ಟೆ ಕಟ್ಟಿಯಾದರೂ ಮಕ್ಕಳನ್ನು ಇಂಗ್ಲಿಷ್'ನಲ್ಲಿ ಓದಿಸಲು ಬಯಸುವ , ಇಂಗ್ಲಿಷನ್ನು ಬಿಡುಗಡೆಯ ಭಾಷೆಯಂತೆ ಭಾವಿಸುವ ಪೋಷಕರು ತಮ್ಮ ಮಕ್ಕಳನ್ನು ಕನ್ನಡದಲ್ಲಿ ಇಂಜಿನಿಯರಿಂಗ್ ಓದಿಸಲು ಮುಂದಾಗುತ್ತಾರೆಯೇ ಎಂದು ತಿಳಿದುಕೊಳ್ಳಬೇಕು.
ಹಿಂದಿ ಹೊರತಾಗಿ ಬೇರೊಂದು ದೇಶ ಭಾಷೆಯನ್ನು ಮನ್ನಿಸದ , ಕೀಳಾಗಿ ಕಾಣುವ ಒಕ್ಕೂಟ ಸರ್ಕಾರ (ಕೇಂದ್ರ ಸರ್ಕಾರ) ಇಂಜಿನಿಯರಿಂಗ್'ನಂತಹ ಅಂತಾರಾಷ್ಟ್ರೀಯ ಜ್ಞಾನ ಶಾಖೆಗಳನ್ನು ದೇಶಭಾಷೆಗಳಿಗೆ ತರುವ ಮೊದಲು ಜನರ ದೈನಂದಿನ ಸಂವಹನಕ್ಕೆ ಬೇಕಾದಂತೆ ಅವರ ನುಡಿಗಳಲ್ಲಿ ಸೇವೆಗಳನ್ನು ಒದಗಿಸಲು ಯಾವ ಪ್ರಯತ್ನ ಮಾಡಿದೆ, ಎಷ್ಟು ಪ್ರಮಾಣದಲ್ಲಿ ಆಡಳಿತವನ್ನು ಜನರ ಮಾತೃಭಾಷೆಯಲ್ಲಿ ತಲುಪಿಸಿದೆ ಎಂದು ತನ್ನನ್ನು ತಾನೇ ಕೇಳಿಕೊಳ್ಳಬೇಕು. ಜುಟ್ಟಿಗೆ ಇಂಜಿನಿಯರಿಂಗ್ ಹೂ ಇಡುವ ಮೊದಲು ಹೊಟ್ಟೆಗೆ ಹಿಟ್ಟು ಹಾಕಬೇಕು.
ಪರ- ವಿರೋಧ : ಚಿಂತನೆಗಳು - ಸವಾಲುಗಳು
ನಮ್ಮ ಸಂಸ್ಕೃತಿ ಧರ್ಮ ಭಾಷೆ ಪ್ರಾಚೀನತೆಯ ಬಗ್ಗೆ ಎಷ್ಟೇ ಹೇಳಿದರೂ ಅದು ಒಂದು ಹೆಜ್ಜೆ ಮುಂದೆ ಹೋಗಿ ನಿಲ್ಲಬಹುದು ಅಷ್ಟೇ. ಆಧುನಿಕ ಯುಗದಲ್ಲಿ ಯಾವ ದೇಶ, ಯಾವ ಜನಾಂಗ ವಿಜ್ಞಾನ ಮತ್ತು ತಂತ್ರಜ್ಞಾನದಲ್ಲಿ ಮುಂದುವರೆದಿರುವುದೋ ಅದು ಮಾತ್ರ ಮೇಲುಗೈ ಸಾಧಿಸಬಲ್ಲದು ತನ್ನ ಜನರಿಗೆ ಉತ್ತಮ ಬಾಳ್ವೆಯನ್ನು ಕೊಡಬಲ್ಲದು, ಈ ಆಧುನಿಕ ಕಾಲದಲ್ಲಿ ಉತ್ತಮ ಆಡಳಿತಕ್ಕೆ ಉತ್ತಮ ತಂತ್ರಜ್ಞಾನವೇ ತಳಗಟ್ಟಾಗಿದೆ. ಆದ್ದರಿಂದ ವಿಜ್ಞಾನ , ತಂತ್ರಜ್ಞಾನದಲ್ಲಿ ಸ್ವಾವಲಂಬನೆ ಬೇಕು ಎನ್ನುವ ಮಾತಿಗೆ ಎರಡಿಲ್ಲ.
ದೇಶಭಾಷೆಗಳಲ್ಲಿ ಇಂಜಿನಿಯರಿಂಗ್ ಶಿಕ್ಷಣ ಕೊಡುವ ಯೋಜನೆಯ ಹಿಂದೆ ಯಾವ ಚಿಂತನಗಳು ಕೆಲಸ ಮಾಡುತ್ತಿವೆ ಎಂದು ನೋಡಬಹುದು.
(1) ಭಾರತೀಯ ಭಾಷೆಗಳು ಯಾವುದೇ ಜ್ಞಾನವನ್ನು ತಿಳಿಸಲು ಸಮರ್ಥವಾಗಿವೆ. ವಿಜ್ಞಾನ , ತಂತ್ರಜ್ಞಾನದಲ್ಲಿ ಬಳಕೆಯನ್ನು ಪ್ರೋತ್ಸಾಹಿಸದ ಕಾರಣ ಆ ನೆಲೆಗಳಲ್ಲಿ ಅವು ಹಿಂದುಳಿದಿವೆ. ಅದನ್ನು ಸರಿಪಡಿಸುವ ಸಮಯ ಈಗ ಬಂದಿದೆ.
(2) ಗ್ರಾಮೀಣ ವಿದ್ಯಾರ್ಥಿಗಳಿಗೆ ವಿದೇಶಿ ಮೂಲದ ಇಂಗ್ಲಿಷ್ ಎದೆಗೆ ತಾಗುತ್ತಿಲ್ಲ ಮತ್ತು ಮೆದುಳಿಗೆ ಹತ್ತುತ್ತಿಲ್ಲ. ಆದ್ದರಿಂದ ಅವರಿಗೆ ಪ್ರತಿಭೆ ಇದ್ದರೂ ತಾಂತ್ರಿಕ ವಿಷಯಗಳನ್ನು ಸರಿಯಾಗಿ ಅರ್ಥಮಾಡಿಕೊಳ್ಳಲು ಆಗುತ್ತಿಲ್ಲ. ಇದರಿಂದ ಪೈಪೋಟಿಯ ಈ ಯುಗದಲ್ಲಿ ಅವರು ಹಿಂದುಳಿಯುವಂತಾಗಿದೆ. ಇದನ್ನು ದೇಶಭಾಷೆಗಳಲ್ಲಿ ಶಿಕ್ಷಣ ಕೊಡುವ ಮೂಲಕ ಸರಿಪಡಿಸಬಹುದು.
(3) ಮುಂದುವರೆದ ಯುರೋಪ್ ದೇಶಗಳು, ಚೀನಾ ಮಾತೃಭಾಷೆಯಲ್ಲಿ ಶಿಕ್ಷಣ ಒದಗಿಸುವ ಮೂಲಕ ಮೇಲುಗೈ ಸಾಧಿಸಿವೆ. ಇದೇ ಮಾದರಿಯನ್ನು ಭಾರತದಲ್ಲಿಯೂ ತರಬೇಕು. ಇಂಗ್ಲಿಷ್ ವಸಾಹತುಶಾಹಿ ಮತ್ತು ಗುಲಾಮಗಿರಿಯ ಸಂಕೇತವಾಗಿದೆ. ಜನರಲ್ಲಿ ತಮ್ಮ ದೇಶ , ಭಾಷೆಗಳ ಬಗ್ಗೆ ಅಭಿಮಾನ ಮೂಡಿಸಲು, ತಮ್ಮ ಸಾಧನೆಗಳ ಬಗ್ಗೆ ಆತ್ಮವಿಶ್ವಾಸ ತುಂಬಲು ಇಂತಹ ಕ್ರಮಗಳು ಬೇಕಾಗಿವೆ ಹಂತ ಹಂತವಾಗಿ ಎಲ್ಲ ಇಂಜಿನಿಯರಿಂಗ್ ದೇಶಭಾಷೆಗಳಲ್ಲಿ ದಕ್ಕುವಂತಾಗುತ್ತದೆ.
(1-1) ತಾತ್ತ್ವಿಕವಾಗಿ ಜಗತ್ತಿನ ಯಾವುದೋ ಒಂದು ಭಾಷೆ ಏನೆಲ್ಲವನ್ನು ವ್ಯಕತಪಡಿಸಬಲ್ಲದೋ ಅದನ್ನು ಇನ್ನೊಂದು ಭಾಷೆಯಲ್ಲಿ ಹೇಳುವುದು ಸಾದ್ಯ. ಇದಕ್ಕೆ ವಿಜ್ಞಾನ , ತಂತ್ರಜ್ಞಾನಗಳು ಹೊರತಲ್ಲ. ಪತ್ರಿಕೆಗಳಲ್ಲಿ ಬರುವ ಜನಪ್ರಿಯ ವೈಜ್ಞಾನಿಕ,ತಾಂತ್ರಿಕ ಲೇಖನಗಳು ಒಂದು ಶೈಲಿಯಲ್ಲಿರುತ್ತವೆ. ಇದು ವಿಜ್ಞಾನ , ತಂತ್ರಜ್ಞಾನದ ಶಿಕ್ಷಣ ಶೈಲಿಯಲ್ಲ. ಕನ್ನಡದಲ್ಲಿ ಶೈಕ್ಷಣಿಕವಾಗಿ ಬಳಸಬಹುದಾದ ವಿಜ್ಞಾನ, ತಂತ್ರಜ್ಞಾನ ವಿಷಯಗಳನ್ನು ಬೋಧಿಸಲು ಹೆಚ್ಚಿನ ಜನರ ಮನ್ನಣೆ ಗಳಿಸಿರುವ , ಒಂದು ಶಿಷ್ಟ ಶೈಲಿ ಈಗಾಗಲೇ ಇದೆ. ಮೈಸೂರು ವಿಶ್ವವಿದ್ಯಾಲಯ ಬಹಳ ಹಿಂದೆಯೇ ತಂದಿರುವ ವಿಷಯ ವಿಶ್ವಕೋಶಗಳು ಇದಕ್ಕೆ ಉದಾಹರನೆಗಳಾಗಿದ್ದು ,ಕನ್ನಡದಲ್ಲಿ ಏನನ್ನು ಬೇಕಾದರೂ ಬರೆಯಬಹುದೆಂದು ಖಚಿತಪಡಿಸಿವೆ. ಸಂಸ್ಕೃತ ಪದಗಳನ್ನು ಸಂಪೂರ್ಣವಾಗಿ ಕೈಬಿಟ್ಟು ಕನ್ನಡ, ದ್ರಾವಿಡ ಮೂಲದ ಪದಗಳನ್ನು ಬಳಸಿ ವಿಜ್ಞಾನ ತಂತ್ರಜ್ಞಾನ ವಿಷಯಗಳನ್ನು ಕಟ್ಟಬಹುದು. ಇದು ಸಾದ್ಯವಿದೆ.. (2-2) ಇಂಗ್ಲಿಷ್ ಭಾಷೆಯಿಂದಾಗಿಯೇ ವಿದ್ಯಾರ್ಥಿಗಳಿಗೆ ವಿಜ್ಞಾನ , ಇಂಜಿನಿಯರಿಂಗ್ ಅರ್ಥವಾಗುತ್ತಿಲ್ಲ ಎನ್ನುವುದು ತಪ್ಪು ಅಭಿಪ್ರಾಯ. ಇಂಜಿನಿಯರಿಂಗ್'ನಲ್ಲಿ ಭಾಷೆಯ ವ್ಯಾಪ್ತಿ ಕಡಿಮೆ. ಸಾಧಾರಣ ಮಟ್ಟದ ಬಳಕೆಗೆ ಅಗತ್ಯವಾದಷ್ಟು ಇಂಗ್ಲಿಷ್ ಸಾಕಾಗುತ್ತದೆ. ವಿಜ್ಞಾನ , ತಂತ್ರಜ್ಞಾನದ ಅತ್ಯಂತ ಕಠಿಣ ವಿಷಯಗಳನ್ನು ಗಣಿತದ ಅಮೂರ್ತ ಸೂತ್ರಗಳ ಮೂಲಕ ಕಲಿಯುವ ವಿದ್ಯಾರ್ಥಿಗೆ ಇಂಗ್ಲಿಷ್ ಭಾಷೆಯೇ ಅಡ್ದಿ ಎನ್ನುವುದು ಸುಳ್ಳು. ವಿಜ್ಞಾನ, ತಂತ್ರಜ್ಞಾನವನ್ನು ಚೆನ್ನಾಗಿ ಅರ್ಥ ಮಾಡಿಕೊಳ್ಳಬಲ್ಲ, ಆದರೆ ಅಭಿವ್ಯಕ್ತಿಯಲ್ಲಿ ತಡವರಿಸುವವರು ಇರುವಂತೆ , ಇಂಗ್ಲಿಷ್'ನಲ್ಲಿ ಉತ್ತಮ ಹಿಡಿತ ಹೊಂದಿದ್ದು ಇಂಜಿನಿಯರಿಂಗ್ , ವಿಜ್ಞಾನದ ವಿಷಯಗಳು ಕಬ್ಬಿಣದ ಕಡಲೆಯಾಗಿ ಇಂಜಿನಿಯರಿಂಗ್ ಕಾಲೇಜಿನಿಂದ ಹೊರನಡೆದವರಿಗೆ ಲೆಕ್ಕವಿಲ್ಲ. ವಿಜ್ಞಾನ ಕೇವಲ ಭಾಷೆಯ ಪಾಂಡಿತ್ಯದಲ್ಲಿಲ್ಲ . ಆದ್ದರಿಂದಲೇ ಕಳೆದೆರಡು ತಲೆಮಾರುಗಳಲ್ಲಿ ಫ್ರೌಢಶಾಲೆಯವರೆಗೆ ಕನ್ನಡ ಮಾಧ್ಯಮದಲ್ಲಿ ಓಡಿದವರು ಅತ್ಯಂತ ಯಶಸ್ವಿ ಇಂಜಿನಿಯರ್, ವೈದ್ಯ , ವಿಜ್ಞಾನಿಗಳಾಗಿರುವುದು ನಮ್ಮ ಕಣ್ಣ ಮುಂದಿದೆ. ವಿಜ್ಞಾನ , ತಂತ್ರಜ್ಞಾನ ಗಣಿತದ ಮೂಲಕ ಹೊರಹಾಕುವ ನಿಸರ್ಗವನ್ನು ವಿವರಿಸುವ ಪರಿಕಲ್ಪನೆ ಮಾತ್ರ . ಸಾಧಾರಣ ಇಂಗ್ಲಿಷ್ ಬಲ್ಲ ಗಣಿತದಲ್ಲಿ ಚುರುಕಾಗಿರುವ ನಿಸರ್ಗದ ತತ್ವಗಳನ್ನು ಅರಿಯಬಲ್ಲ ವಿದ್ಯಾರ್ಥಿಗೆ ವಿಜ್ಞಾನ ಎಂಜಿನಿಯರಿಂಗ್ ಪಠ್ಯಗಳಲ್ಲಿರುವ ಇಂಗ್ಲಿಷ್ ಒಂದು ಅಡಚಣೆಯ ಅಲ್ಲ
(3-3) ದೇಶಭಾಷೆಗಳಲ್ಲಿ ವಿಜ್ಞಾನ , ತಂತ್ರಜ್ಞಾನದ ಶಿಕ್ಷಣವನ್ನು ಪ್ರತಿಪಾದಿಸುವವರು ಯುರೋಪಿನ ಸಣ್ಣ ದೇಶಗಳಿಗೆ ಸಾಧ್ಯವಾದುದು ನಮಗೇಕೆ ಆಗದು. ಕೀಳರಿಮೆ, ಜಡತ್ವಗಳನ್ನು ತೊರೆದರೆ ಭಾರತೀಯ ಭಾಷೆಗಳು ಅದೇ ಸಾಧನೆ ಮಾಡಬಲ್ಲವು ಎನ್ನುತ್ತಾರೆ. ಆಧುನಿಕ ವಿಜ್ಞಾನ 15ನೇ ಶತಮಾನದಿಂದ ಈಚೆಗೆ ಯುರೋಪಿಯನ್ನರು ನೀಡಿದ ಕೊಡುಗೆ ಎನ್ನುವುದನ್ನು ಕಡು ರಾಷ್ಟ್ರೀಯವಾದಿಯೂ ಹೊರಗಲ್ಲದಿದ್ದರೂ ಒಳಗೆ ಒಪ್ಪುತ್ತಾನೆ. ಯೂರೋಪಿನ ದೇಶಗಳು ಭಾಷೆಯ ಆಧಾರದ ಮೇಲೆ ರಚಿತವಾಗಿರುವ ರಾಜ್ಯರಾಷ್ಟ್ರಗಳು. ಆದ್ದರಿಂದಲೇ ವೈಜ್ಞಾನಿಕ ಕ್ರಾಂತಿಯ ಮೊದಲ ದಿನಗಳಿಂದಲೂ ಅವು ವಿಜ್ಞಾನ , ತಂತ್ರಜ್ಞಾನಗಳಲ್ಲಿ ಭಾಗಿಯಾಗುತ್ತಾ ಕಾಣಿಕೆ ನೀಡುತ್ತಾ ಬಂದಿರುವುದರಿಂದ ಆ ಭಾಷೆಗಳು ವಿಜ್ಞಾನ-ತಂತ್ರಜ್ಞಾನದ ಶಿಕ್ಷಣದಲ್ಲಿ ಯಶಸ್ವಿಯಾದವು ಆದ್ದರಿಂದಲೇ ಆಲ್ಬರ್ಟ್ ಐಲನ್'ಸ್ಟೀನ್ ತಮ್ಮ ಸಿದ್ಧಾಂತಗಳನ್ನು ಮೊದಲಿಗೆ ತಮ್ಮ ತಾಯಿತಾಯಿನುಡಿಯಲ್ಲಿ ಬರೆಯಲು ಸಾಧ್ಯವಾಯಿತು. ಚೀನಾದಲ್ಲಿ ವಿಜ್ಞಾನ ತಂತ್ರಜ್ಞಾನಗಳನ್ನು ಅವರ ಭಾಷೆಯಲ್ಲಿಯೇ ತಂದಿರುವುದರ ಉದಾಹರಣೆಯನ್ನು ಕೆಲವರು ನಮ್ಮ ಮುಂದಿರಿಸುತ್ತಾರೆ. ಆದರೆ 140 ಕೋಟಿ ಜನರಿರುವ ಚೀನಾ ದೇಶ ಒಂದೇ ಭಾಷೆ ಒಂದೇ ಸಂಸ್ಕೃತಿ ಎನ್ನುವ ದಬ್ಬಾಳಿಕೆಯ ತತ್ವವನ್ನು ಅಳವಡಿಸಿಕೊಂಡಿದೆ ಅದು ಭಾರತದಲ್ಲಿ ಸಾಧ್ಯವಿಲ್ಲ
ಯುರೋಪಿನ ದೇಶಗಳಲ್ಲಿ ವಿಜ್ಞಾನ ತಂತ್ರಜ್ಞಾನ ಅವುಗಳದೇ ಆದ ದೇಶ ಭಾಷೆಗಳಲ್ಲಿ ಇರುವುದಾದರೂ ಸದ್ಯದಲ್ಲಿ ಸಂವಹನ , ಸಂಶೋಧನೆ ಎಲ್ಲವೂ ಇಂಗ್ಲಿಷ್'ನಲ್ಲಿದೆ. ಚೀನಾ ದೇಶ ಇಂಗ್ಲಿಷ್ ಮೂಲಕವೇ ಜಗತ್ತಿನ ಜ್ಞಾನವನ್ನು ಪಡೆಯುತ್ತಿದೆ ಮತ್ತು ಕೊಡುತ್ತಿದೆ. ವಿಜ್ಞಾನ , ತಂತ್ರಜ್ಞಾನ ನಿಸರ್ಗವನ್ನು ಹುಡುಕುವ , ಬಳಸುವ ವಿದ್ಯೆಗಳಾಗಿರುವುದರಿಂದ ಸತತ ಒಬ್ಬರಿಗೊಬ್ಬರು ಕೊಟ್ಟುಕೊಳ್ಳುವ ಸಂಗತಿಯಾಗಿರುತ್ತದೆ. ಇದು ಇತರ ಸಂಗತಿಗಳಂತೆ ನಿರ್ದಿಷ್ಟ ಧರ್ಮ, ಸಮಾಜ, ಭಾಷೆ, ಕಾಲಕ್ಕೆ ಸೀಮಿತವಾಗಿರುವುದಿಲ್ಲ. ಆದ್ದರಿಂದ ಇಂಗ್ಲಿಷ್ ಅಲ್ಲದಿದ್ದರೆ ಆ ಜಾಗದಲ್ಲಿ ಬೇರೊಂದು ಭಾಷೆ ಬೇಕಾಗುತ್ತದೆ. ಇದರ ಹೊರತು ವಿಜ್ಞಾನ, ತಂತ್ರಜ್ಞಾನದ ಬೆಳವಣಿಗೆಯಿಲ್ಲ, ಮುಂದುವರಿಕೆಯಿಲ್ಲ. ಆದ್ದರಿಂದ ಅತ್ಯಂತ ಪ್ರತಿಭಾವಂತನಾದ ಕನ್ನಡದಲ್ಲಿ ಇಂಜಿನಿಯರಿಂಗ್ ಪಡೆದಾತ ತನ್ನ ಜ್ಞಾನವನ್ನು ಜಗತ್ತಿಗೆ ಹಂಚಲು ಮತ್ತು ಪಡೆಯಲು ಇಂಗ್ಲಿಷ್ ಬೇಕಾಗುತ್ತದೆ. ಆಗ ಇಂಗ್ಲಿಷ್ ಕಲಿಯುವುದು ತೊಡಕಾಗುವುದಿಲ್ಲವೇ?
ಕನ್ನಡದಲ್ಲಿ ಇಂಜಿನಿಯರಿಂಗ್
ಕನ್ನಡದಲ್ಲಿ ಇಂಜಿನಿಯರಿಂಗ್ ಶಿಕ್ಷಣ ಏಕೆ ಕಾರ್ಯಸಾಧುವಲ್ಲ ಮತ್ತು ಪ್ರಸ್ತುತವೇ ಎನ್ನುವುದನ್ನು ನೋಡೋಣ
(1) ಕನ್ನಡ ಮಾತ್ರವಲ್ಲ ಯಾವ ಭಾರತೀಯ ಭಾಷೆಯಲ್ಲಿಯೂ ಪೂರ್ಣ ಮಟ್ಟದ ವೈಜ್ಞಾನಿಕ , ತಾಂತ್ರಿಕ ಪಾರಿಭಾಷಿಕ ಪದಕೋಶ ಸಾಧ್ಯವಾಗಿಲ್ಲ - ಆಗುವುದೂ ಇಲ್ಲ. ಇಂಗ್ಲಿಷ್'ನಲ್ಲಿರುವ ಒಂದು ತಾಂತ್ರಿಕ ಪದವನ್ನು ಹಲವು ಲೇಖಕರು ಹಲವು ಕನ್ನಡ ಪದಗಳಲ್ಲಿ ಗುರುತಿಸುತ್ತಿದ್ದಾರೆ. ಇಂತಹ ಒಂದಕ್ಕಿಂತ ಹೆಚ್ಚು ಪದಗಳ ಬಳಕೆ ಗೊಂದಲ ಉಂಟು ಮಾಡುತ್ತದೆ. ಸಂಸ್ಕೃತ ಬಳಸಿ ಕಟ್ಟುತ್ತಿರುವ ಪಾರಿಭಾಷಿಕ ಪದಗಳು ಅರ್ಥ ಮಾಡಿಕೊಳ್ಳಲು ಬಳಕೆಯಲ್ಲಿರುವ ಸಾಧಾರಣ ಇಂಗ್ಲಿಷ್ ತಾಂತ್ರಿಕ ಪದಗಳಿಗಿಂತ ಕಷ್ಟವಾಗಿವೆ. ಅಚ್ಚ ಕನ್ನಡದ ಹೊಸ ಪದಗಳನ್ನು ಕಟ್ಟಬಹುದಾದರೂ ಅವು ಬಳಕೆಯಲ್ಲಿರುವ ಇಂಗ್ಲಿಷ್ ಪದಗಳ ಎದುರು ನಿಲ್ಲಲಾರವು. ಏಕೆಂದರೆ ಹೊಸದಾಗಿ ಕಟ್ಟಲ್ಪಟ್ಟ ಕನ್ನಡ ಪಾರಿಭಾಷಿಕ ಪದಗಳನ್ನು ಅರಿಯಲು ಮತ್ತೊಮ್ಮೆ ಇಂಗ್ಲಿಷ್'ಗೆ ಮೊರೆ ಹೋಗಬೇಕು. ಹಾಗೆ ಹೋದಾಗ ಹೆಚ್ಚು ಚಲಾವಣೆಯಲ್ಲಿರುವ ಇಂಗ್ಲಿಷ್ ಪದಗಳು ಉಳಿದುಕೊಳ್ಳುತ್ತದೆ.
(2) ಅಖಿಲ ಭಾರತೀಯ ತಾಂತ್ರಿಕ ಶಿಕ್ಷಣ ಪರಿಷತ್ತು ಹೊಸದಾಗಿ ಪಾರಿಭಾಷಿಕ ಪದಕೋಶ ಕಟ್ಟುವ ಬದಲು ಇಂಗ್ಲಿಷ್ ಪದಗಳನ್ನು ಬಳಸಲು ಸೂಚಿಸಿದೆ. ಇಂತಹ ಸ್ಥಿತಿಯಲ್ಲಿ ಕನ್ನಡ ಇಂಜಿನಿಯರಿಂಗ್'ನಲ್ಲಿ ಬಹುತೇಕ ಪದಗಳು ಇಂಗ್ಲಿಷ್ ಭಾಷೆಯವಾಗಿದ್ದು ವಿಭಕ್ತಿ ಪ್ರತ್ಯಯ ಮತ್ತು ವಾಕ್ಯದ ಕೊನೆಯ ಹೇಳಿಕೆಗಳು ಮಾತ್ರ ಕನ್ನಡದಲ್ಲಿ ಇರುತ್ತವೆ ಇದು ಹೇಗಿರುತ್ತದೆಯೆಂದರೆ ಈ ಹಿಂದೆ ಪ್ರಕಟವಾಗುತ್ತಿದ್ದ ಕನ್ನಡದಲ್ಲಿ ಟಿವಿ ರಿಪೇರಿ ಮತ್ತು ಸರ್ವೀಸ್ ಕೈಪಿಡಿಗಳನ್ನು ಹೋಲುತ್ತವೆ. ವಿಜ್ಞಾನ , ತಂತ್ರಜ್ಞಾನದಲ್ಲಿರುವ ಗಣಿತ ಭಾಷಾತೀತವಾಗಿರುತ್ತದೆ.
(3) ವಿಜ್ಞಾನ, ತಂತ್ರಜ್ಞಾನ ಪ್ರತಿ ವರ್ಷ ಹಿಂದಿನ ವರ್ಷದ ಹಲವು ಪಟ್ಟು ಬೆಳೆಯುತ್ತಿದೆ ಸಂಶೋಧನೆಗಳು ಪಾರಿಭಾಷಿಕ ಪದಗಳು , ಗಣಿತ ಹೊರಹೊಮ್ಮುತ್ತಿವೆ. ಆಗಸಕ್ಕೇರಿ ದಿನದಿಂದ ದಿನಕ್ಕೆ ಮೇಲೇರುತ್ತಿರುವ ಇವುಗಳನ್ನು ಹಿಡಿಯಲು ನಾವು ಮೊದಲ ಹೆಜ್ಜೆ ಇಡುವಷ್ಟರಲ್ಲಿಯೇ ಅವು ಕಣ್ಣಿಗೆ ಕಾಣದಷ್ಟು ಎತ್ತರಕ್ಕೆ ಏರಿರುತ್ತವೆ.
(4) ವಿಟಿಯು ಒಂದೆರಡು ವರ್ಷ ಕೆಲ ಇಂಜಿನಿಯರಿಂಗ್ ಪುಸ್ತಕಗಳನ್ನು ಕನ್ನಡಕ್ಕೆ ತರಬಹುದು. ಹೀಗೆ ತಂದ ಪುಸ್ತಕಗಳು ಕೈಬೆರಳೆಣಿಕೆಯಲ್ಲಿರುತ್ತವೆ. ಆದರೆ ಇಂಜಿನಿಯರಿಂಗ್ ಕಲಿಯಲು ಹಲವಾರು ಇತರ ವಿವಿಧ ಆಕರಗಳು ಬೇಕು. ಇಂತಹ ಹೆಚ್ಚಿನ ಜ್ಞಾನಕ್ಕೆ ಇಂಗ್ಲಿಷ್ ಪುಸ್ತಕಗಳಿಗೆ ಹೋಗಬೇಕಾಗುತ್ತದೆ. ದೇಶ ಭಾಷೆಗಳಲ್ಲಿ ವಿಜ್ಞಾನ ಮತ್ತು ತಂತ್ರಜ್ಞಾನವನ್ನು ಬೋಧಿಸುತ್ತಿರುವ ದೇಶಗಳು ಸಹಜ ಬೆಳವಣಿಗೆಯಾಗಿ ವೈಜ್ಞಾನಿಕ, ತಾಂತ್ರಿಕ ಆಕರಗಳನ್ನು ಪಡೆದವು. ಅದರ ಬದಲು ನಾವು ಈಗ ಪ್ರಯತ್ನಪೂರ್ವಕವಾಗಿ ಅವುಗಳನ್ನು ಪಡೆಯಲು ಹೆಣಗುತ್ತಿದ್ದೇವೆ. ಹಾಗೆ ಪಡೆಯಲು ಬೇಕಾದ ಅಪಾರ ಶ್ರಮ, ಸಂಪನ್ಮೂಲ , ಗಟ್ಟಿ ಮನಸ್ಸು ನಮ್ಮಲಿಲ್ಲ. ವಿಟಿಯು ಎಷ್ಟು ಪುಸ್ತಕಗಳನ್ನು ಕನ್ನಡದಲ್ಲಿ , ಯಾವಾಗ ತರುತ್ತದೆ ಎನ್ನುವುದನ್ನು ತಿಳಿಸಿದರೆ ಒಳ್ಳೆಯದು. ನಾನು ಓದಿರುವ ಸಿವಿಲ್ ಇಂಜಿನಿಯರಿಂಗ್ ವಿಚಾರವನ್ನೇ ತೆಗೆದುಕೊಂಡರೆ , ಪದವಿ ಮುಗಿದ ತಕ್ಷಣ ಕೆಲಸಕ್ಕೆ ಸೇರಿದ ಮೇಲೆ ಕಾಲೇಜಿನಲ್ಲಿ ಕಲಿತದ್ದಕ್ಕಿಂತ ಹಲವು ಪಟ್ಟು ಇತರ ಆಕರಗಳನ್ನು ಅವಲಂಬಿಸಬೇಕಾಗುತ್ತದೆ. ಕಟ್ಟಡದ ಯೋಜನೆ ಮಾಡಲು ಮಾರ್ಗದರ್ಶಿ ಸೂತ್ರಗಳನ್ನು ಹೊಂದಿರುವ ನ್ಯಾಷನಲ್ ಬಿಲ್ಡಿಂಗ್ ಕೋಡ್ 1300 ಪುಟಗಳನ್ನು ಮೀರಿದೆ. ಸಿವಿಲ್ ಇಂಜಿನಿಯರಿಂಗ್ ವೃತ್ತಿಯವರು ಸಾಮಾನ್ಯವಾಗಿ 446 ಕೋಡ್ ಆಫ್ ಪ್ರಾಕ್ಟೀಸ್ ಬಳಸುತ್ತಾರೆ. ಇವಲ್ಲದೆ ಇತರ ವಿಶೇಷ ಆಕರಗಳಿಗೂ ಮೊರೆ ಹೋಗಬೇಕಾಗುತ್ತದೆ. ಇವೆಲ್ಲವುಗಳನ್ನು ದೇಶಭಾಷೆಗಳಿಗೆ, ಕನ್ನಡಕ್ಕೆ ತರಲಾಗುವುದೇ? ಇಲ್ಲ ಎಂದಾದರೆ ಕನ್ನಡದಲ್ಲಿ ಕಲಿತವರನ್ನು ನಡುನೀರಿನಲ್ಲಿ ಕೈಬಿಟ್ಟು ಮುಂದೆ ನೀವಾಗಿಯೇ ಇಂಗ್ಲಿಷ್ ಸಾಗರದಲ್ಲಿ ಈಜಿ ದಡ ಸೇರಿ ಎಂದಂತಾಗುತ್ತದೆ.
(5) ವಿಜ್ಞಾನಿಗಳು, ಇಂಜಿನಿಯರ್'ಗಳು ಈಗ ವಿನ್ಯಾಸ, ನಿರ್ಮಾಣ , ತಯಾರಿಕೆ , ನಿರ್ವಹಣೆ ಮುಂತಾದ ಕೆಲಸಗಳಿಗೆ ಬಳಸುತ್ತಿರುವ ಯಾವುದೇ ಕ್ರಮವಿಧಿ ( ಸಾಫ್ಟ್'ವೇರ್) ಭಾರತೀಯ ದೇಶಭಾಷೆಗಳಲ್ಲಿ ಇಲ್ಲ. ಕೆಲವು ಪುಸ್ತಕಗಳನ್ನು ಅನುವಾದಿಸುವಷ್ಟು ಸುಲಭವಾಗಿ ಇವನ್ನು ಇತರ ಭಾಷೆಗಳಿಗೆ ತರಲಾಗದು. ವ್ಯಾವಹಾರಿಕ ಲಾಭ, , ಗ್ರಾಹಕರ ವಿಶಾಲ ತಳಹದಿ ಇರದ ಹೊರತು ಯಾವ ಕಂಪೆನಿಯೂ ಏನನ್ನೂ ಮಾಡದು. ಈ ಸಮಸ್ಯೆಗೆ ವಿಟಿಯು ಯಾವ ಮಾರ್ಗ ಹುಡುಕಿದೆ ಎನ್ನುವುದು ಸ್ಪಷ್ಟವಾಗಿಲ್ಲ.
(6) ಕನ್ನಡದಲ್ಲಿ ಇಂಜಿನಿಯರಿಂಗ್ ಓದಿದರೆ ಸ್ನಾತಕೋತ್ತರ ಪದವಿಗೆ ಏನು ಮಾಡಬೇಕು ? ರಾಷ್ಟ್ರಮಟ್ಟದಲ್ಲಿ ನಡೆಯುವ ಪರೀಕ್ಷೆಗಳು ಹೇಗಿರುತ್ತವೆ. ಕರ್ನಾಟಕದ ಹೊರಗಿರುವ ಐಐಟಿ ಅಥವಾ ಇನ್ನಾವುದೇ ಕಾಲೇಜುಗಳಲ್ಲಿ ಇವರು ಯಾವ ಭಾಷೆಯಲ್ಲಿ ಓದಬೇಕು ? ಹೆಚ್ಚಿನ ಅಧ್ಯಯನಯಕ್ಕೆ ವಿದೇಶಕ್ಕೆ ಹೋಗಬೇಕೆಂದರೆ ಏನು ಮಾಡಬೇಕು? ಉದಾಹರಣೆಗೆ ಅಮೆರಿಕ , ಜರ್ಮನಿ ಕಾಲೇಜುಗಳು ಕನ್ನಡದಲ್ಲಿ ಓದಿದವರನ್ನು ಪರಿಗಣಿಸುತ್ತವೆಯೇ ?
(7) ಭಾರತದ ಒಂದೊಂದು ದೇಶ ಭಾಷೆಯು ತನ್ನದೇ ಆದ ಪಾರಿಭಾಷಿಕ ಪದವನ್ನು ಕಟ್ಟಿಕೊಂಡಿದೆ. ತಮಿಳಿನಲ್ಲಿ ಇಂಜಿನಿಯರಿಂಗ್ ಕಲಿತವರು ಕನ್ನಡದಲ್ಲಿ ಕಲಿತವರೊಂದಿಗೆ ಇಂಗ್ಲಿಷ್'ನಲ್ಲಿಯೇ ಸಂವಹಿಸಬೇಕಾಗುತ್ತದೆ. ಯಾವ ಇಂಗ್ಲಿಷ್ ತಪ್ಪಿಸಬೇಕೆಂದು ಹೆಣಗಲಾಯಿತೋ ಅದೇ ಬೇರೆ ರೂಪದಲ್ಲಿ ಮರಳುತ್ತದೆ.
(8) ದೇಶ ಭಾಷೆಗಳಲ್ಲಿ ಇಂಜಿನಿಯರಿಂಗ್ ಕಲಿಸುವ ಅಂಗವಾಗಿ ಈಗಾಗಲೇ ಪ್ರಾಥಮಿಕ ಹಂತದ ಹಲವಾರು ಪಠ್ಯಗಳನ್ನು ಇಂಗ್ಲಿಷ್'ನಿಂದ ಭಾಷಾಂತರಿಸುತ್ತಿರುವ ಕೆಲಸ ಸಾಗಿದೆ ಇದರಲ್ಲಿ ಮೂಲದಲ್ಲಿ ಉಪನ್ಯಾಸಕ ಇಂಗ್ಲಿಷ್'ನಲ್ಲಿ ಇಂಜಿನಿಯರಿಂಗ್ ಪಾಠಗಳನ್ನು ಮಾಡಿದ್ದಾರೆ ಇವುಗಳು ವಿಡಿಯೋ ಸಹಿತವಾಗಿವೆ ಇವುಗಳನ್ನು ಕನ್ನಡಕ್ಕೆ ಅನುವಾದಿಸಿ ಪ್ರಸ್ತುತಪಡಿಸುವುದು ಮುಂದುವರಿದಿದೆ. ಮೂಲ ಪಾಠಗಳು ತೀರ ಅಡ್ಡಾದಿಡ್ದಿಯಾಗಿದ್ದು ಅವುಗಳ ಅನುವಾದಗಳು ಹಾಗೆಯೇ ಇವೆ. ಇಂತಹ ಪ್ರಯತ್ನಗಳಿಂದ ಆಯಾಸವಾಗುವುದೇ ಹೊರತು ಕನ್ನಡ ಒತ್ತಟ್ಟಿಗೆ ಇರಲಿ ಭಾರದ ಯಾವ ದೇಶಭಾಷೆಗೂ ಇಂಜಿನಿಯರಿಂಗ್ ಬರುವುದಿಲ್ಲ. ಇದರಿಂದ ಸಮಯ , ಸಂಪನ್ಮೂಲ ಎರಡೂ ಹಾಳು.
ತಾಂತ್ರಿಕ ಅಸ್ಪೃಶ್ಯತೆ
ಕನ್ನಡ / ದೇಶಭಾಷೆಯಲ್ಲಿ ಇಂಜಿನಿಯರಿಂಗ್ ಕಲಿಯುವುದು ಹೇಗೆ ತಾಂತ್ರಿಕ ಅಸ್ಪೃಶ್ಯತೆಗೆ ಕಾರಣವಾಗುತ್ತದೆ ಎನ್ನುವುದು ಕೆಳಗಿದೆ.
(1) ವಿಜ್ಞಾನ ಮತ್ತು ಇಂಜಿನಿಯರಿಂಗ್ ನಮ್ಮ ದೇಶದಲ್ಲಿ ನಾವು ಮಾತ್ರ ನಮಗಾಗಿ ಮಾತ್ರ ಬಳಸಬಹುದಾದ ಜ್ಞಾನವಲ್ಲ. ಪೈಪೋಟಿಯ ಜಗತ್ತಿನಲ್ಲಿ ಯಾವುದೇ ದೇಶಕ್ಕೆ ಯಾವುದೇ ವಿಜ್ಞಾನ ಮತ್ತು ತಂತ್ರಜ್ಞಾನಗಳ ಸೇವೆಯನ್ನು ಒದಗಿಸಬೇಕಾಗುತ್ತದೆ ಬೆಂಗಳೂರಿನಲ್ಲಿರುವ ದೇಶೀಯ ಮತ್ತು ಬಹುರಾಷ್ಟ್ರೀಯ ಕಂಪನಿಗಳು ನೇಮಕಾತಿಯಲ್ಲಿ , ಅವಕಾಶಗಳನ್ನು ಒದಗಿಸುವಲ್ಲಿ ಭಾಷೆ ಧರ್ಮ ಪ್ರಾಂತ್ಯದ ತಾರತಮ್ಯ ಮಾಡುತ್ತಿವೆ. ಇದರ ಜೊತೆಗೆ ಇವು ಇನ್ನು ಮುಂದೆ ಇಂಜಿನಿಯರಿಂಗ್ ಕಲಿಕೆ ಮಾಧ್ಯಮದ ಭೇದ ಮಾಡ ತೊಡಗುತ್ತವೆ ಕನ್ನಡದಲ್ಲಿ ಇಂಜಿನಿಯರಿಂಗ್ ಕಲಿತ ವ್ಯಕ್ತಿಯನ್ನು ಖಂಡಿತವಾಗಿ ಕೀಳಾಗಿ ಕಾಣುತ್ತವೆ, ಆ ಸಾಪ್ಟ್'ವೇರ್ ಗೊತ್ತೇ , ಆ ಕೌಶಲ ಇದೆಯೇ , ಈ ಕೌಶಲ ಇದೆಯೇ , ಪದವಿಯ ನಂತರ ಈ ಕೋರ್ಸ್ ಕನ್ನಡದಲ್ಲಿ ಮಾಡಿದಿರಾ, ಇಂಗ್ಲಿಷ್'ನಲ್ಲಿ ಮಾಡಿದಿರಾ, ನಿಮಗೆ ನಿಜವಾಗಿಯೂ ಅದು ಅರ್ಥವಾಯಿತಾ ಎಂದು ಅಣಕಿಸುತ್ತವೆ. ಇಂಜಿನಿಯರಿಂಗ್ ಪದವಿ ಮಾತ್ರ ಸಲ್ಲದು ಮೆದು ಕೌಶಲಗಳು ಬೇಕು, ಇಂಗ್ಲಿಷ್'ನಲ್ಲಿ ಸುಲಲಿತ ಸಂವಹನ ಸಾಮರ್ಥ್ಯ ಬೇಕು ಎಂದು ಹೇಳತೊಡಗುತ್ತವೆ. ಇನ್ಫೋಸಿನ್ ಎನ್.ಆರ್ ನಾರಾಯಣಮೂರ್ತಿಯವರು ಮಗು ಬೆರಳು ಚೀಪುವ ದಿನದಿಂದಲೇ ಇಂಗ್ಲಿಷ್ ಕಲಿಯಬೇಕೆಂದು ಹೇಳುವುದು ಗುಟ್ಟೇನಲ್ಲ. ಇವರ ಕಂಪೆನಿ ಕನ್ನಡದಲ್ಲಿ ಇಂಜಿನಿಯರಿಂಗ್ ಕಲಿತವರನ್ನು ಹೇಗೆ ಕಾಣುತ್ತದೆ ಎನ್ನುವುದನ್ನು ಹಾಗೆಯೇ ಕನ್ನಡೇತರರು ತುಂಬಿರುವ ಕಂಪೆನಿಗಳಲ್ಲಿ ಇಂತಹ ಇಂಜಿನಿರ್'ಗಳಿಗೆ ಕೆಲಸ ಸಿಗಬಹುದೇ , ಒಮ್ಮೆ ಸಿಕ್ಕರೂ ಅವರ ಸ್ಥಿತಿ ಏನೆಂದು ಊಹಿಸಿಕೊಳ್ಳಿ.
(2) ಕನ್ನಡದಲ್ಲಿ ಇಂಜಿನಿಯರಿಂಗ್ ಕಲಿತವರು ಕರ್ನಾಟಕಕ್ಕೆ ಮಾತ್ರ ಸೀಮಿತವಾಗ ಬೇಕಾಗುತ್ತದೆ ಕೇಂದ್ರ ಸರ್ಕಾರ ತನ್ನ ವಿವಿಧ ಹುದ್ದೆಗಳಿಗೆ ಇಲಾಖೆಗಳಿಗೆ ಇಂಜಿನಿಯರ್'ಗಳನ್ನು ನೇಮಕ ಮಾಡಿಕೊಳ್ಳುವಾಗ ಭಾಷಾವಾರು ಮೀಸಲು ನೀಡುತ್ತದೆಯೇ ಹಾಗಿದ್ದರೆ ನಮಗೆ ಸಿಗುವುದು ಚಿಪ್ಪೆ. ಏಕೆಂದರೆ ಶೇಕಡ 46% ಇರುವ ಹಿಂದಿ ಭಾಷಿಕರು ಎಲ್ಲವನ್ನೂ ಬಾಚಿಕೊಳ್ಳುತ್ತಾರೆ ಅದರ ಬದಲು ಒಟ್ಟು ತಾಂತ್ರಿಕ ಹುದ್ದೆಗಳಲ್ಲಿ 10-15 % ಸ್ಥಾನಗಳನ್ನು ದೇಶಭಾಷೆಗಳಲ್ಲಿ ಶಿಕ್ಷಣ ಪಡೆದವರಿಗೆ ಮೀಸಲಿಡುತ್ತಾರೆ ಎಂದೇ ಭಾವಿಸೋಣ ಆಗ ಸಾವಿರ ಹುದ್ದೆಗಳಲ್ಲಿ 3-4 ಹುದ್ದೆಗಳು ಕನ್ನಡಕ್ಕೆ ಸಿಗಬಹುದೇನೋ.
(3) ಕರ್ನಾಟಕ ಸರ್ಕಾರ ಮುಂದಿನ ದಿನಗಳಲ್ಲಿ ಕನ್ನಡದಲ್ಲಿ ಇಂಜಿನಿಯರಿಂಗ್ ಓದಿದವರಿಗೆ ಪ್ರಶಸ್ತಿ ಕೊಡುತ್ತದೆಯೇ ಎಂದರೆ ಇದಕ್ಕೆ ಇಲ್ಲ ಎಂದೇ ಹೇಳಬೇಕಾಗುತ್ತದೆ. ಏಕೆಂದರೆ ಇಂಜಿನಿಯರಿಂಗ್'ನಲ್ಲಿ ಕಲಿಯುವ ಮಾಧ್ಯಮಕ್ಕಿಂತ ಬೇರೆಯದೇ ಆದ ತಾಂತ್ರಿಕ ಪ್ರಾಯೋಗಿಕ ಅರಿವು ಬೇಕು. ಕರ್ನಾಟಕ ಸರ್ಕಾರ ಹತ್ತು-ಹದಿನೈದು ಹುದ್ದೆಗಳನ್ನು ಮೀಸಲಿರಿಸಿದರೂ ಯಾರಾದರೂ ನ್ಯಾಯಾಲಯದ ಕದ ತಟ್ಟಿದರು ಮುಂದೇನಾಗುತ್ತದೆ. ಅಲ್ಲದೆ ಖಾಸಗೀಕರಣದ ಈ ಕಾಲದಲ್ಲಿ ಸರ್ಕಾರ ಒದಗಿಸುವ ಅವಕಾಶಗಳು ಮರುಭೂಮಿಯಲ್ಲಿ ಮೂರು ಹನಿ ಚೆಲ್ಲಿದಂತೆ ಅಷ್ಟೇ. ತಮಿಳುನಾಡಿನಲ್ಲಿ ಈಗಾಗಲೇ ಪಾಲಿಟಿಕ್ನಿಕ್ ಹಂತದಲ್ಲಿ ತಮಿಳು ಮಾಧ್ಯಮ ವಿದೆ ಈ ಮಾಧ್ಯಮದಲ್ಲಿ ಕಲಿತವರು ಕಲಿತವರಿಗೆ ಸಿಕ್ಕುತ್ತಿರುವ ಅವಕಾಶಗಳು ತೀರಾ ಸೀಮಿತವಾಗಿರುವುದನ್ನು ನಾವು ಗಮನಿಸಬೇಕು. ಇಲ್ಲಿಯೂ ತಮಿೞು ಮಾಧ್ಯಮದಲ್ಲಿ ಕಲಿತವರಿಗೆ ಮೀಸಲಾತಿಯಿಲ್ಲ.
ಇವೆಲ್ಲ ಕಾರಣಗಳಿಂದ ಕನ್ನಡದಲ್ಲಿ ಇಂಜಿನಿಯರಿಂಗ್ ಶಿಕ್ಷಣ ಪಡೆಯಲು ಬರುವವರ ಸಂಖ್ಯೆ ಬೆರಳೆಣಿಕೆಯನ್ನು ದಾಟುವುದಿಲ್ಲ.ಕನ್ನಡದಲ್ಲಿ ಓದಿದರೆ ಇಂಜಿನಿಯರಿಂಗ್ ಚೆನ್ನಾಗಿ ಅರ್ಥವಾಗುತ್ತದೆ ಎನ್ನುವ ತಪ್ಪು ತಿಳುವಳಿಕೆಯಿಂದಲೋ ಅಥವಾ ದೇಶ , ರಾಜ್ಯ, ಭಾಷೆ ಅಭಿಮಾನದಿಂದಲೋ ಕನ್ನಡದಲ್ಲಿ ಇಂಜಿನಿಯರಿಂಗ್ ಓದಿದರೆ ಮೀಸಲಾತಿಗಾಗಿ ಮನವಿ ಮಾಡುವ ತಾಂತ್ರಿಕ ಅಸ್ಪೃಶ್ಯರ ಗುಂಪೊಂದು ಹುಟ್ಟಿದರು ಸೋಜಿಗವಿಲ್ಲ.
ಮುಂದೇನು ?
ಹಾಗಾದರೆ ಕನ್ನಡ/ದೇಶ ಭಾಷೆಗಳು ಮುಂದುವರಿಯಬಾರದೆ , ಇಂಗ್ಲೀಷ್ ವಸಾಹತುಶಾಹಿಯ ನೆರಳಿನಲ್ಲಿ ಬದುಕಬೇಕೆ ಎನ್ನುವ ವಾದ ಮುಂದಾಗುತ್ತದೆ. ಆದರೆ ವಾಸ್ತವ ಹಾಗಿಲ್ಲ ವಿಜ್ಞಾನ ಮತ್ತು ತಾಂತ್ರಿಕ ಜಗತ್ತನ್ನು ಆಳುತ್ತಿರುವುದು ಅದರಲ್ಲಿನ ಸಾಧನೆಯೇ ಹೊರತು ಅದು ಕಲಿತ ಮಾಧ್ಯಮವಲ್ಲ. ಹಾಗಾದರೆ ನಾವು ಏನು ಮಾಡಬಹುದು ಇಂಜಿನಿಯರಿಂಗ್ ಕನ್ನಡದಲ್ಲಿ ತರುವ ಎಂದಿಗೂ ತಲುಪಲಾಗದ ಯೋಜನೆಯನ್ನು ಕೈಬಿಟ್ಟು 5ನೇ ತರಗತಿಯವರೆಗೆ ಕನ್ನಡ ಮಾಧ್ಯಮದಲ್ಲಿ ಕಡ್ಡಾಯವಾಗಿ ನಂತರ ತರಗತಿಗಳಲ್ಲಿ ಗಣಿತ, ವಿಜ್ಞಾನಗಳನ್ನು ಕನ್ನಡ ಮತ್ತು ಇಂಗ್ಲಿಷ್ ಎರಡರಲ್ಲೂ ಆಯ್ಕೆಯಾಗಿ ಓದುವ ಹಾಗೂ ಮಾನವಿಕ ವಿಷಯಗಳನ್ನು ದೇಶ ಭಾಷೆಯಲ್ಲಿಯೇ ಕಲಿಸುವ ನೀತಿಯನ್ನು ತರಬೇಕು . ಹಾಗಾದಾಗ ಕನ್ನಡದ ಗಟ್ಟಿ ನೆಲೆಯಿಂದ ಆತ್ಮವಿಶ್ವಾಸದಿಂದ ಬೀಗುವ ಜಗತ್ತಿನಲ್ಲಿ ಎಲ್ಲಿಗಾದರೂ ಹೋಗಬಲ್ಲ, ಹೋರಾಡಬಲ್ಲ ಇಂಗ್ಲಿಷ್'ನಲ್ಲಿ ಶಿಕ್ಷಣ ಪಡೆದ ಇಂಜಿನಿಯರ್'ಗಳು ಆಗುತ್ತಾರೆ.
ಕೊನೆಯದಾಗಿ ಒಂದು ಪ್ರಶ್ನೆ :
ಅಖಿಲ ಭಾರತೀಯ ತಾಂತ್ರಿಕ ಶಿಕ್ಷಣ ಪರಿಷತ್ತು ಹಾಗೂ ವಿಶ್ವೇಶ್ವರಯ್ಯ ತಾಂತ್ರಿಕ ವಿಶ್ವವಿದ್ಯಾಲಯದಲ್ಲಿ ಎಷ್ಟು ಜನ ತಮ್ಮ ಮಕ್ಕಳನ್ನು ಕನ್ನಡ ಅಥವಾ ಭಾರತೀಯ ದೇಶಭಾಷೆಗಳಲ್ಲಿ ಓದಿಸಲು ಸಿದ್ಧರಾಗಿದ್ದಾರೆ ? ಹಾಗೆ ಯಾರೂ ಇರದಿದ್ದರೆ ಕಂಡವರ ಮಕ್ಕಳನ್ನು ಬಾವಿಗೆ ತಳ್ಳಿ ಆಳ ನೋಡಲು ಇವರಿಗೆ ಅಧಿಕಾರ ಕೊಟ್ಟವರು ಯಾರು?